uriola.eus

Kukutzako auziperatua: "Argi geratu da elkartasuna baino ez genuela adierazi"

  Jendartea  Errekalde

Kukutza III gaztetxea okupatzeagatik epaituak izaten ari diren 23 lagunen aurkako epaiketaren bigarren eguna da gaurkoa. 960 euroko isuna eskatzen dio fiskalak bakoitzari, eta lagun bati hiru urte eta egun bateko espetxe zigorra Ertzaintzari hainbat objektu jaurtitzeagatik. Gaur, lekukoek deklaratu dute.

Atzo hasi zen epaiketa eta bihar, urtarrilak 30, bukatzea aurreikusi dute. Epaituetako batek, gaur goizean URIOLAri esandakoaren arabera, atzoko saioa "nahiko ondo joan zen". Fiskalaren tesiak "ez zeukan nondik heldu; berak erasotzaile moduan jartzen gintuen une oro. Baina gure aldetik, nahiko argi gertau zen elkartasuna baino ez genuela adierazi Kukutzan beste milaka lagunekin batera".

Gaurko agerraldian, besteak beste, hainbat ertzainek deklaratu dute. Atzoko egunean auziperatuek egindako deklarazioaren kontran azaldu dute, eraikinean zeudela "gauzak ugari bota" zizkietela eta haiek, pilota bakarra jaurti zutela. Hala ere, ez dira gai izan gauzak botatzeaz akusatutako inor identifikatzeko.

Jose Luis Padillak ere hartu du hitza, Errekaldeko auzo elkarteko ordezkariak eta argi utzi du "Kukutza auzoaren arima zela". Bukatzeko, Bilboko Udaleko teknikarien txanda izan da, tartean Txema Azkuenagarena, EH Bilduko zinegotzi ohia, eta agerian geratu da gaztetxean egindako zenbait ekitaldi diruz lagundu zituela Udalak.

Bihar da amaitzeko epaiketa fiskalaren eta abokatuen ondorioekin. Bestalde, 20:00etan, manifestazio bat abiatuko da Sabin Etxetik.

23 auziperatuak babesteko hainbat pertsonak elkarretaratzea egin dute 8:30ean, Buenos Aures kaleko epaitegi aurrean, bigarren egunez "Ni ere egon nintzen" lelopean. 

[2015/01/29] Iñaki Carro: "Denborak argi utzi duena da kaltetu bakarra Errekalde auzoa izan dela"

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa