Urtarrilaren 30eko greba orokorraren harira eta Bilboko Alde Zaharreko greba batzordeak antolatuta, urtarrilaren 25ean, larunbata, goizeko 11:30ean Santiago plazan hainbat eragilek eta sindikatu ezberdinetako kideek hitzaldia emango dute lan, pentsio eta bizitza duinen inguruan. Parte hartzaileen artean aurkitzen dira ELA, LAB eta CNT sindikatuak, Andrea Uña, Bizkaiko Pentsionisten Mugimenduko kidea, Khadime Sambe, Mbolo Moye Doole elkarteko kidea, Eragin Bilboko gazte prekarizatuen asanblada eta Lorea Ureta, ATH-Etxeko Langileen Elkarteko kidea. Arratsaldeko 19:00etan ordea Unamuno plazatik abiatuko den manifestazioa egingo dute.
Urtarrilaren 25ean, larunbata, Txalaparta jaia ospatuko dute Deustuko Erriberako Bizinahi Auzo Gunean. Txalaparta tailerrak, poteoa eta parrillada antolatu dituzte besteak beste.
Bilboko Alde Zaharreko Erronda kaleko 2. zenbakian kokatuta dagoen Bira Kultur Guneak urtarrileko agenda kaleratu du. Adin eta gustu guztientzako ekintzak eskainiko dituzte urtarrilaren 5etik 31ra bitartean.