Andy Jones izan da lehena Salbe zubian ezarritako tranpolinetik salto egiten. Hiru segundoko iraupena izan duen jauziak ikusleen txalo zaparrada eragin du. Uretan sartzean entzun den hotsak, berriz, harridura sortu du. "Zelako zarata", adierazi du Salbe zubipean zegoen mutil batek hortzak estuturik. Steven Lobuek eta David Colturik egin dute jauzi ondoren jendearen animo, oihu eta txalo artean.
Apur batera hurbildu da Artem Silchenko iazko txapelduna ere. Beraren ostean beste jauzilari batzuk. Larunbatean lehiatuko diren 14ak ez ordea. Izan ere gaurkoa entrenamendu librea izan da. Hautazkoa. Biharko entrenamenduaren amaieran (13:30-15:30), azken saltoan jasotzen duten puntuazioaren arabera erabakiko da larunbatean (15:00) nor noren kontra lehiatuko den.
Ezohiko itxura zuen gaur Salbe zubiaren inguruak. Itsasadar bazterrean jende ugari batu da, batzuk jesarrita beste batzuk zutik, argazki makinak eta telefonoak eskutan zituztela. Denak gora begira, Salbera begira. Ehunka pertsona hurbildu dira entrenamenduak jarraitzera. Bihar eta etzi epaile lanetan arituko diren bost lagunak ere Salbeko zubipera bertaratu dira. Uretan ere mugimendua izan da nagusi, besteak beste, piraguak, uretako motorrak, padel surflariak eta urpekariak. Jeep bat ere bai plataforma baten gainean.
[2014/09/17] Salbe zubiko jauzilarien entrenamendu zein probak aldaketa ugari eragingo ditu
[2014/07/21] Munduko 14 jauzilari onenak Salbe zubitik saltoka