Gaur, osteguna, Buenos Aires kalean, Bilboko epaitegian, 10:15ean, 'Txiolariak aske! Adierazpen askatasuna!' lelopean elkarretaratzean parte hartzeko deia zabaldu dute herritarren artean deklaratzera joango direnei babesa emateko.
Salaketa
Gaur goizeko deklarazioa, baina, ez da maiatzean atxilotutako lagunen aurkako epaiketa izango, Guardia Zibilaren aurkakoa baizik. Operazio horretan atxilotutako kide batzuek salaketa jarri baitute legez kanpo atxilotu zituztela eta defentsarako eskubidea urratu zietela argudiatuta. Gauzak horrela, lekuko moduan deklaratuko dute Alfredo Remirez bilbotarrak zein beste atxilotutako lagunek.
Armiarma operazioak
Guardia Zibilak, sare sozialetan "terrorismoa goratzea eta biktimak iraintzea egotzita", 'Armiarma' operazioaren lehen fasea 2014ko apirilean jarri zuten martxan, 21 atxiloketarekin; azaroan beste 19 lagun atzeman zituzten bigarren fasean. 2015eko maiatzaren 19koa 'Armiarma' operazioaren hirugarren fasea izan zen. Bere baitan, Bizkaian, lau lagun atxilotu zituzten; Alfredo Remirez bilbotarra, Kaiet Prieto, Xabier Arruza eta Andeka Jurado. Gizpuzkoan hiru lagun gehiago atzeman zituzten. Deklaratu ostean, kargupean, aske geratu ziren.
'Txiolarien' aurkako epaiketa
Alfredo Remirezek adierazi du 'txiolarien' aurkako epaiketan jada deklaratu duela. Amurrioko epaitegian egin zuen deklarazioa, Entzutegi Nazionalarekin bideo-konferentzia eginaz. Baina epaiketa oraindik bukatu ez dela azaldu du Remirezek.
[2015-05-19] Alfredo Remirez aske utzi dute
[2014-11-06] Hiru lagun atxilotu dituzte Bilbon sare sozialetan terrorismoa goratzea egotzita
[2014-07-03] Bilboko gazte bat atxilotu dute sare sozialetan terrorismoa goratzea leporatuta