Inauteriak ospatu ezik, Deustuko Erriberako bizilagunek merezi dute garapen inklusibo eta ekitatiboa, eta funtsezkoak diren hainbat espazio aldarrikatu zituzten pasa den larunbatean.

“Gentrifikazioa” terminoa 60.hamarkadan hasi zen erabiltzen Londresen, Ruth Glass soziologa ingelesaren eskutik. Hiriaren iparraldeko etxebizitzetan eraldaketak eman ziren; tradizionalki langile klasekoenak ziren etxebizitzak, bat-batean klase ertain-altuek okupatu zituzten,  birbalorizatu eta modan jarri baitziren.

Imanolek Orokietak, Soziologian graduatua, gurera ekarri du “gentrifikazio” hori bere Gradu Amaierako Lanaren bitartez. Bertan, hirietako zenbait gunetan gertatzen den gentrifikazio prozesuaren pasaia-aldaketaren alderdiaren inguruan mintzo da, Deustuko Erriberan gertatzen ari den gentrikifazioaren inguruan zehazki. Gerora kartografietara itzulitako Erriberako paisaia jaso eta Deustuko Erriberako Paisaia-Mapa ondu du bere lanean.